Udala tokiko merkataritzaren lehiakortasuna hobetzeko Zornotzanerosi online plataforman ari da lanean

2021/01/30
Lehiakortasuna hobetzeko eta tokiko merkataritzaren berehalako eta etorkizuneko erronkei aurre egiteko diseinatutako plataforma hau martxorako prest izatea espero da. Plataformak hiru aukera eskaintzen ditu: fitxa direktorio bat sortzea, erakusleiho denda bat edo online denda bat.

Amorebieta-Etxano, 2021eko urtarrilaren 30an, larunbata. Amorebieta-Etxanoko Udaleko Enplegua eta Ekonomia Sustatzeko Saila buru belarri dihardu Zornotzanerosi online merkataritzako plataforma martxorako prest izateko. Plataforma berritzaile honi esker, Amorebieta-Etxanoko merkatariek beren negozioak internet bidez ikusgai jarri ahal izango dituzte, bezero potentzialak areagotuz eta ziur aski salmentak indartuz.

Plataforma lehiakortasuna hobetzeko eta tokiko merkataritzaren berehalako eta etorkizuneko erronkei aurre egiteko diseinatuta dago eta hiru aukera eskaintzen ditu: direktorio-fitxa bat sortzea, erakusleiho denda bat edo on-line denda bat. Gainera, plataformak aukera emango du sistema propioa duten saltokien on-line salmenta-zerbitzuekin lotzeko.

Udalak plataforma sortzeko kostua bere gain hartuko du, baita lehenengo bi urteetako mantentze-lanak eta domeinu eta hosting-aren lehenengo urteko kostua.

Establezimenduak sare sozialetan publizitatea egitea erabakiko balu, kudeaketaren gastu osoa bere gain hartu beharko luke. Gainera, bigarren urtetik aurrera domeinuaren eta hosting-aren ardura izango du eta hirugarren urtetik aurrera, bere establezimenduaren ondoriozko mantentze teknikoarena. Hala ere, plataforma kudeatzeaz arduratzen den enpresak aldez aurretik emango du kostu horien berri.

Udaleko Enplegua eta Ekonomia Sustatzeko Sailak, herriko merkatari eta establezimendu guztiak animatu nahi ditu Zornotzanerosi plataformara atxikitzera tokiko merkataritzari bultzada sendo bat emateko itxaropenez. Informazio gehiago jaso nahi dutenek Amorebieta-Etxanoko Udaleko Enplegu eta Ekonomi Sustapen sailarekin harremanetan jar daitezke 946300002 telefonora deituz edo sustapena@amorebieta.eus helbide elektronikora mezu bat bidaliz.