Ganeko igerilekuak datorren ekainaren 15ean zabalduko ditu Udalak, murrizketarik gabe

2022/06/02
Bi urteko pandemia eta gero, denboraldi berria ez da Covid-19ak eragindako osasun-krisiak ezarritako mugen mende egongo.

Amorebieta-Etxanoko Udalak Ganeko igerilekuen denboraldi berria irekiko du ekainaren 15ean (asteazkena), Covid-19ak eragindako osasun-krisiak ezarritako murrizketarik gabe. Igerilekuen ordutegia, astelehenetik larunbatera, 11:00etatik 21:00etara izango da; igandeetan eta jaiegunetan ere zabalik izango dira, 11:00etatik 20:00etara.

Tarifa ezberdinak
Tarifei dagokienez, igerilekuetara sartzeko banakako sarrerak edo 10 sarrerako bonuak erosi ahal izango dira. Horrela, helduen banakako sarrerak 4 euroko prezioa izango du, eta adingabeen tarifak 2 eurokoa. Halaber, 10 paseko bonuak 30,30 eurokoak izango dira, eta haurrenak, berriz, 15,20 eurokoak. Bestalde, elkarteek eta udalekuetako erabiltzaileek egun bateko sarrerak erosi ahal izango dituzte, helduen kasuan 2 euroan eta adingabeen kasuan 1,10 euroan. 

3 hilabeterako abonua egiteko aukera
Ganeko igerilekuak erabili ahal izateko abonua nahiago duten zornotzarrek, udako hiru hilabeteetarako egiteko aukera izango dute. Amorebieta-Etxanon erroldatutakoek abonu aukera hauek dituzte: familiarra, 45,50 euro; banakakoa, 30,30 euro; 15 urtetik beherakoa, 20,20 euro; eta Gazte Karneta izanda, 24,20 euro.  Udalerrian erroldatuta ez dauden pertsonen kasuan, abonuen prezioa honako hau izango da: familiarra, 71,00 euro; banakakoa, 51,50 euro; 15 urtetik beherakoa, 36,40 euro; eta Gazte Karneta izanda, 39,40 euro. Era berean, Amorebieta-Etxanoko kirol-instalazioetarako urteko edo sei hileko abonua duten herritarrek sarbidea izango dute Gane igerilekura.