Amorebieta-Etxanoko Udalak Zelaieta parkeko haurrentzako jolasgunea estaltzeko proiektua onartu du

2022/06/03
• Gaur, Gobernu Batzordeak onartutako proiektuak, 523.000 euroko aurrekontua aurreikusten du, eta behin egikaritze-fasean sartzen denean, lau hilabetetan eginda izatea espero da.

Amorebieta-Etxanoko Udalak Zelaieta parkean dagoen haurrentzako jolasgunea estaltzeko proiektua onartu du gaur, Gobernu Batzordean. 523.000 euro inguru bideratuko ditu obra honetarako, eta aurreikusten da, exekuzio-fasean sartzen denean, lau hilabeteko epean eginda egotea.

Urte guztirako jolasgunea
Inguru honetan ohikoa izaten da eguraldi txarra egitea; hori horrela, Amorebieta-Etxanoko Udalak lehentasuna eman nahi dio gune estali berriak sortzeko beharrari, herriko haurrek urte osoan zehar jolasteko aukera izan dezaten, eta hala nahi duten herritarrek leku babestu batean egon edo esertzeko aukera izan dezaten.  

Horrela, Zelaieta parkea estaltzeko proiektuak 610,10 m2-ko estalki angeluzuzen bat egitea aurreikusten du, egur laminatuzkoa, herrigunean urteko edozein unetan erabili ahal izango den espazio estali bat izatea ahalbidetuko duena. Estalkiak zurezko zortzi euskarri-puntu izango ditu perimetroan; erdiko espazioa libre geratuko da, jolasgunea ez oztopatzeko eta egungo diseinuari eusteko.

Estalkiak malda eta norabide desberdineko ur-diseinua izango du, horrela, mugimendu-sentsazioa sortuko du, eta estruktura bera ingurunean integratuko da. Era berean, parkeko sarbiderik jendetsuenek Zelaieta Zentroaren bisuala mantenduko dute, Amorebieta-Etxanoko eraikin enblematikoenetako baita. Halaber, estaldurak polikarbonatozko itxitura bat izango du bere perimetroan, euria sartzea saihestuko duena; honek eguraldi txarretik babestuko ditu bertan dauden herritarrak, batez ere neguko hilabeteetan.

Egurrezko estruktura
Egiturak bi habe nagusi izango ditu erdian eta egur laminatuzko beste bi habe tartean. Habe horiek perimetro-habeak eta uhalak izango dituzte, eta horiek polikarbonatozko estalduraren euskarri izango dira. Habeak eta zutabe berriak parkeko sotoan dauden zutabeetan oinarrituko dira. Egitura egur laminatu koladuna izango da, industria-produktu normalizatu honek formatu handiak ahalbidetzen baititu. Mantentzeari eta zahartzeari dagokienez, egur laminak ez du ia mantentze-lanik behar. Era berean, eta baldintza klimatologikoak eta honek kanpoko itxuran duten eragina aintzat hartuta, ‘pinu basatia’ espezieko egurra erabiltzea erabaki da, material honek ondo eusten baitio denboraren joanari, itxurari eta iraunkortasunari. Gainera, zurak berotasuna eta estetika ona ematen ditu, eta egitura ingurunean integratuta geratzea ahalbidetzen du, parkeko berdeguneekin bat.

Polikarbonatoa estaltze elementu gisa
Estalkia polikarbonato trinkozko xaflekin estaliko da, oso material arina baita, talkarekiko erresistentzia handikoa. Polikarbonatoaren mantentzea oso txikia da, baldintza normaletan euria nahikoa baita garbi mantentzeko. Gainera, UV kapari esker, eremuak eguzki-erradiazio infragorri ikusezina eta beroa blokeatuko ditu, udan tenperatura baxuagoak ahalbidetuz.

Estalkiaren itxurari dagokionez, kolore berdea eta urdina aukeratu dira, biak ere transluzituak; hala, ingurua eta egurrezko egitura estalki barrutik ikusi ahal izango dira, eta, era berean, eguzki-egunetan itzala emango du.

LED tiraz egindako argiztapena
Azkenik, argiztapenari dagokionez, Amorebieta-Etxanoko Udalak LED tira malgu batzuk instalatzea aurreikusi du. Tira horiek habeen beheko aldean jarriko dira, eta hala, parkeaz eta espazioaz gozatzeko aukera izango da neguan izaten diren ilunabar goiztiarretan.